Phitsanulok ne estas aparte spektakla aŭ populara vizitloko sur turisma mapo de Tajlando, tamen ne mankas al ĝi ĉarmo. La urbon inter Bangkoko kaj Chiang Mai oni kutime rigardas nur transirante per aŭtoŝoseo aŭ trajnvojo. Halto tie ebligas ĝui plenan trankvilecon, elspiron for de turisma svarmo kaj pacan tajan vivritmon. En migradoficejo mi estis la ununura vizitanto kaj plilongigo de vizo postulis nur kelkajn minutojn [pasis du monatoj kaj mi ne transiris eĉ duonon de la lando - tio servu kiel rekomendo pri vizitado de Tajlando..!].

Persone mi memoros la urbon ne pro ora templo aŭ onidire plej bela statuo de Budho en Tajlando (aspektis tute nerimarkinda al mi), sed ĉefe pro sperto de unua profesia masaĝo en mia vivo. Efektivigita sur matraco, surstrate proksime al nokta bazaro, unuhora sesio kostis ~3.5eur kaj ĉiuokaze estis plej mia bona masaĝo iam ajn. Mi postulas: rajto al masaĝo estu nova baza homrajto!

Survoje suden, estis bone halti en Bangkoko eĉ nur por sperti vendredan vesperon en Khaosan road. Kelkaj elektitaj rimarkoj
- pro laŭteco de muziko, la grundo vibras antaŭ ol oni povas vidi la straton
- la strato mem, plena de neonoj kaj reklamekranoj, ardas freneze
- meze fluas homamaso, enpremita malgraŭ vasteco de la strato, ĉefe, sed ne nur - tre juna kaj internacia
- ĝi estas preskaŭ tute okupita per budoj de stratvendistoj, drinkejaj tabloj ktp,
- en konstruaĵoj situas ĉefe klubejoj kaj drinkejoj, sed muziko fluas ne el konstruaĵoj, sed el potencaj sonsistemoj starigitaj rekte sur strato, unu apud alia
- laydyboys dancantaj sur tabloj
- odoro de kanabo kaj alkoholo
- trudemaj vendistoj de brakbendoj kun stultaj skribaĵoj kiel 'mi manĝas piĉojn'
- ulo kun frititaj skorpioj provas vendi siajn varojn al dancantaj homoj
- vendistoj de specialaj 'spektakloj', inkluzive de fama 'pingpong show' (mi ne eksplikos ĉi tie pri kio temas; se vi ne scias - ne bedaŭru)
- kelkjara infano vendanta rozojn al ebriuloj meze de tiu diboĉado
- viando de krokodilo
- virinoj kaptantaj manojn de trapasantoj kaj ofertantaj siajn intimajn servojn
- kelkaj belaspektaj, sed kostaj klubejoj
- resume: granda klf, altege en mia listo de plej absurdaj lokoj vizititaj iam ajn